EBSCO группээс Монгол улсын иргэдэд  зориулан 2013 оны 12-р сарын 01-ний өдрөөс ирэх оны 05-р сарын 01-ний өдрийг хүртэл таван сарын хугацаагаар Англи хэлний мэдлэгээ системтэйгээр сонсох болон унших чадвар сайжруулах  English Language Learner онлайн  мэдээллийн санг Соёл, спорт, аялал жуучлалын яам, Монголын Номын Сангуудын Консорциумаас хамтран үнэ төлбөргүйгээр ашиглах эрхийг нээж байгаадаа баяртай байна. 

Англи хэл cуралцахыг хүссэн хэн боловч доорх зурган дээр дарж холбогдох боломжтой. 

Тус мэдээллийн сан нь бага ангийн сурагчаас эхлээд насанд хүрсэн суралцагч Англи хэлний сонсох чадвараа дээшлүүлэх,  өөрийн мэдлэгийн анхан, дунд болон гүнзгий түвшинд сэдвийг сонгон унших, мэдлэгийн түвшингээ шалгах зэрэг олон боломжуудыг та бүхэнд олгох болно.

Видео танилцууллага Англи хэлээр доор орууллаа. 

Жич: Тодоруулах зүйл гарвал 99007127 дугаарт холбогдоно уу.

Олон улсад “Нээлттэй Мэдээллийг" сурталчилах өдөрлөгийг жил болгоны 10 дугаарын 22-28-ны хооронд сурталчилдаг бөгөөд энэ хүрээнд Шинжлэх ухааны Академи, Монголын Номын Сангуудын Консорциум, Монголын Залуу Эрдэмтдийн Холбоотой хамтран Springer Science+Business Media компаний дэмжлэгтэйгээр "Нээлттэй мэдээллийг" сурталчилах өдөрлөгийг 2 дахь удаагаа Монгол-Японы төвийн  хурлын "Их Танхимд" амжилттай зохион байгууллаа. Уг өдөрлөг нь залуу эрдэмтэн, судлаач нарт зориулан олон улсын эрдэм шинжилгээний бүтээлийг сурталчилан таниулах, түүнийг ашиглах боломж болон өөрсдийн бүтээл, судалгааг олон нийтэд хүргэх, ингэхдээ эрдэм шинжилгээний өгүүллийг  хэрхэн бичих, мэдээлэлд хэрхэн дөт замаар хүрэх, эрдэм шинжилгээний өгүүлэл бүтээлээ  гадаад, дотоодын нэр хүнд бүхий сэтгүүлд яаж хэвлүүлэх талаар танилцуулж сурталчилахад гол зорилго нь байлаа.  Өдөрлөгт ШУА-ийн харьяа хүрээлэн, төвийн залуу эрдэм шинжилгээний ажилтнууд болон  их дээд сургуулийн залуу багш нарын төлөөлөл болсон нийт 200 гаруй  залуу эрдэмтэн судлаач нар оролцлоо.  Өдөрлөгийг нээж ШУА-ийн эрдэмтэн нарийн бичгийн дарга, академич Т. Галбаатар,  Монголын Залуу Эрдэмтдийн холбооны ерөнхийлөгч, доктор Ч. Сономдагва нар залуу судлаачдад хандаж үг хэлсэн бөгөөд Монголын номын сангуудын консорциумын гүйцэтгэх захирал Л. Гантулга “Нээлттэй мэдээлэл ба хөгжүүлэх асуудал”,  “Олон улсын нээлттэй сэтгүүлд өгүүлэл хэвлүүлэх боломж”,  “Эрдэм шинжилгээний мэдээлэл хайх аргачлал” гэсэн илтгэлүүдийг тус тус хэлэлцүүлэв. Хэлэлцүүлгээр SpringerOpen, BioMedCentral сайтуудын мэдээллийн сангийн танилцууллага болон Zotero програмын дэлгэрэнгүй танилцуулсан бөгөөд эрдэмтэн судлаачийн судалгааны ажлын  ёсзүйн талаар мөн судалгааны ажилтай холбоотой номзүйн асуудлын талаарх өөрийн туршлага мэдлэгээ залуу судлаачид нартай хуваалцсан юм.Мөн залуу судлаачдад зориулж Монголын Номын Сангуудын Консорциум нь  АмерикийнМонгол Судлалын төвийн тэтгэлэгт хөтөлбөрөөр ирсэн Нью-Йоркийн Их Сургуулийн номын санч M.Биллтэй хамтран нээлттэй мэдээллийн вэб болон бусад холбогдох мэдээлэл багтаасан “Open Acces Resources for Researchers in Mongolia” - http://oaguide.mongolianlibraries.org.mn вэб хуудасыг танилцуулаа. Тус мэдээллийн сангаас тэтгэлэгт хөтөлбөр болон олон ном, сэтгүүлийг унших боломжтойг дурьдлаа.

 Өдөрлөгийн сүүлд хамгийн их идэвхитэй оролцсон залуу судлаачдад Springer-ийн нэрийн бэлгийг гардуулсан бөгөөд залуучууд санал бодлоо чөлөөтэй ярилцснаар  өдөрлөг дуусав. 

Д.Нацагдоржийн нэрэмжит Улаанбаатар хотын нийтийн төв номын санд(ХНТС) 2009 оны 10 сараас ажилласан КОЙКА олон улсын байгууллагын сайн дурын мэргэжилтэн, номын санч Шинэ Хэ Ён-ны санаачлага, оролцоотойгоор уг төслийг боловсруулж, КОЙКА байгууллагаас 22000 доллар, бусад эх үүсвэрээс үлдсэн санхүүжилтийг авч, Монголын Номын сангуудын консорциумын мэргэжил арга зүйн туслалцаатайгаар “Номын сангийн вэб систем, Цахим уншлага үйлчилгээ”-г үйлчилгээндээ нэвтрүүлж, эхлүүллээ.

Төслийн хүрээнд номын сангийн бүртгэл, үйлчилгээний Виндувс (Windows) суурьтай хуучин системийн өгөгдлийн санг Интернэт суурьтай, юникод дэмждэг, онлайн системд MARC21 стандартыг баримтлан хөрвүүлснээр номын сангийн үйлчилгээний онлайн kоха систем ашиглалтанд оруулав.
Мөн номын сангийн уншигчид зөвхөн цаасан ном, хэвлэл, мэдээллийн эх сурвалжийг ашиглах бус хэрэглэгч, иргэдийн мэдээллийн технологи ашиглан бие даан суралцах, мэдээлэл олж авах орчин нөхцлөөр хангахыг зорьж, Цахим уншлагын үйлчилгээг бага насны хүүхдэд зориулсан 2, цахим сонин хэвлэл, цахим мэдээлэл уншиж, ашиглахад зориулсан 16 компьютер, утасгүй сүлжээтэй үйлчилгээний орчинг бүрдүүлж чадлаа.

Мелинда ба Билл Гейтс сан /Melinda and Bill Gates Foundation/-аас санхүүжүүлж, ЭЙПЛ байгууллага/EIFL/ нь дэлхийн улс орнуудын нийтийн номын сангуудад зориулсан Нийтийн номын сангийн шинэчлэлтийн хөтөлбөр /Public Library Innovation Program/ төслийн шалгаруулалтын 2010 оны төслийн уралдаант шалгаруулалтанд оролцсон 49 орны 324 төслөөс сонгогдсон 12 төслөөс Д.Нацагдоржийн нэрэмжит Улаанбаатар хотын нийтийн төв номын сан, Монголын Хараагүйчүүдийн үндэсний холбоотой хамтран бичсэн Харааны бэрхшээлтэй иргэдэд зориулсан "ДЭЙЗИ Тоон ярьдаг номын төвийг байгуулах"  төсөл шалгарч 21 аймгийн нийтийн номын сангууд анх удаагаа харааны бэрхшээлтэй иргэдэд зориулсан Дэйзи форматийн ярьдаг номоор үйлчлүүлэх бололцоо нээгдлээ.